DEPORTE DEN FAKANSI KU SEDREKO, MCB I REFINERIA ISLA A FNALISA AYERA... Ku un asistensia masal: DEPORTE DEN FAKANSI KU SEDREKO, MCB I REFINERIA ISLA A FNALISA AYERA... Un promedio di 1.200 mucha pa aktividat a partisipá... WILLEMSTAD- Ku un asistensia masal ayera a tuma lugá e último aktividat di deporte den fakansi organisá pa Fundashon Sedreko ku sosten di Maduro & Curiel%u2019s Bank i Refineria Isla. Riba e último fecha amigunan di Refineria Isla a repartí no ménos ku 1.500 T-shirt loke ta ilustrá e partisipashon masal di nos hubentut. Sr. "Tòni" Bakboord , hefe di e departamentu di deporte i rekreashon di Fundashon Sedreko tabata hopi kontentu. E la rekonosé ku tabatin algun momento ferfelu kaminda ku muchanan di poko mas edat a duna nan trabou pa motibu di komportashon ménos bon, sinembargo e aktividat deportivo aki a bira algu asina grandi ku kasi bo no por imaginá mas un fakansi grandi sin dje. Bou di guia di ekspertonan ta brinda nos hubentut grátis e posibilidat di rekreá partisipando den mas ku 50 aktividat diferente. "E la bira algu realmente hopi grandi, e promé fecha i e último tabatin asistensia masal di mucha. Nos ta kalkulá riba 1.500 mucha. Libramente por bisa ku nos a drai riba un promedio di mas o ménos 1.200 mucha pa aktividat e aña aki", asina Sr. "Tòni" Bakboord a splika. Lo bai studia kon pa hasi pa na un próksimo okashon evitá konfrontashon entre e muchanan poko mas grandi ku ta bishita e aktividat. Sinembargo ta algu ku mester kontinuá spesialmente pa e míles di muchanan ku no por bai estranheria den fakansi i ku tin e nesesidat riba un rekreashon sano. Sr. Bakboord a probechá pa un biaha mas gradisí MADURO & CURIEL%u2019S BANK i REFINERIA ISLA pa nan koperashon, paso sin nan lo tabata imposibel. Na tur e 9 aktividatnan tur mucha ku a presentá a haña 1 pandushi i tambe 1 refresko kompletamente grátis. Danki tambe na e grupo grandi di lidernan deportivo i otro boluntarionan ku a traha atrobe den e proyekto bunita i balioso aki. Tambe un danki na "security", na e personal di EHBO, Sentro Deportivo Kòrsou i na tur ku di un manera òf otro a traha di manera ku masha hopi mucha a bolbe pasa un fakansi inolvidabel. Durante e aktividat aki bou di guia di e konosido Sr. Rudsel Antonia, choreografista tabatin tambe dos "workshop" di baile pa nos hóbennan. Ounke tabata algun dia di trabou duru, tòg ta mira atras ku hopi satisfakshon, Sr. "Tòni" Bakboord a finalisá bisando.